Bismillaahi Raxmaanni Raxiim!

Ku soo dhawaada Bogga Wararka.

Boggu waa qabyo oo weli dhismo ayaa ku socda, sida idiinka muuqata, waxaanse idiinku bishaaraynayaa inaad goor dhow ka haqabbeeli doontaan arrimaha la xiriira dhacdooyinka caalamaiga ah iyo wararkii ugu dambeeyey ee Soomaalida iyo dunida Islaamka, In-shaa'allah.

Waxaan dhammaan akhristayaasha boggan ee sharafta leh ka codsanayaa inay ii soo gudbiyaan wixii talo-bixin ah ama dhaliil soo jeedin ah, si aan u hagaajiyo tayada iyo bilicda bogga. Waa walaalkiin Cabdirashid Cabdi Muuse oo idin leh isma-dhaafno igu soo biira...waadna mahadsan tihiin! -Wasalaama Calaykum!

/Cabdirashid.

Dagaallo ka dhacay Kismaayo

  • (KISMAAYO)06.01. Waxaa laga soo sheegay magaalada Kismaayo in shalay oo ah ahayd 6dii Jan.99ka, ay dib uga soo cusboonaadeen dagaallo ka dhaca aaggaas mar kale. Sida lagu soo warramayo, waxaa dhacday in ciidamadii ururka SNF-tu ay aroornimadii ka soo weerareen galbeedka iyo woqooyiga magaalada. Dagaalkaas oo socday muddo aan ka yarayn afar saacadood, waxaa labada dhinac ee magaalada ku hardamayay ay adeegsadeen hubka cul-culus oo ay ka mid yihiin hoobiyayaasha iyo lidka dayuuradaha.

    Dagaalkaasi wuxuu sababay khasaarooyin badan oo soo gaadhay dhimayaashii magaalada. Waxaa intaa dheer oo lagu soo warramayaa in dhaawac kor u dhaafay 100 qof iyo dhimashaba ay jiraan. Nin u hadlay ururka SPM oo hadda gacanta ku haya maamulka magaalada Kismaayo, wuxuu caddeeyay in ay ka dileen SNF-ta 40 nin, 35 kalan ay qafaasheen . Dhinacoodana, wuxuu afhayeenku sheegay in dagaalka ay kaga dhinteen 8 askari, laakiin cid madax-bannaan oo arrimahan xaqiijisay majirto ilaa imminka. Magaaladuna imminka waa caadi oo wey deggan tahay, kadib markii ciidamadii ururka SNF-ta dib looga saaray oo ay ku noqdeen halkii fadhigoodu ahaa oo ah Goobweyn.

  • Wixii ku soo kordha arrintan, dib ayaan idiin kala soo socodsiin doonaa, in-shaallah.
    idil94@hotmail.com | Ku noqo bogga billowgiisa